شعور سخيف
أنك تحس بأن وطنك شئ ضعيف
صوتك ضعيف
رأيك ضعيف
أنك تبيع قلبك و جسمك
و أنك تبيع قلمك و أسمك
مايجيبوش حق الرغيف
***********
سألو جحا عن سر ضحكو
قال : أصل أتنين و شبكو
اللي كان تحت ميت
و اللي كان فوق كفيف
دا شعور سخيف
و شعور سخيف
أنك تكون رمز الشحاتة
تبني مبني للشحاتة
و تعمل وزراة للشحاتة
يا ساقية دوري
عدي فوقي و دوسي
نصبو عليا و شحتوني فلوسي
ربطوني فيك .. حتي ما أتغميت
هما اللي فرحوا ..
ووحدي أنا أتغميت
أنا اللي صاحب البيت
عايش بدون لازمة
و لما مرة شكيت .. أدوني بالجزمة
أنا اللي زارعك دهب
بتأكلني سباخ
أن كان دة تقل و دلع
بزيادة .. دلعك باخ
لا شفت فيكي هنا
ولا شفت فيكي ترف
كل اللي فيكي قرف
كرامتنا متهانة
و اللقمة بأهانة
بتخلفنا لية ..
لما أنتي كرهنا
يعني أية تبقي أنتي هبة النيل يا بوبا
و كل يوم المية تقطع
يعني أية لما شتكي غلو الفاتورة
يقولو أشتكي بس تدفع
يعني أية لما قش ألارز ثروة بتتحرق
و لما نفط ألامة ثروة بتتسرق
و لما جلادك علي ولادك بيبطش
و لما علمك ميلاقيش يأكل فيطفش
يعني أية نرفع أيدينا بالسلام
لجل الغزاة
و يعني أية لما أبقا ماشي في حالي
أتشد أشتباة
و يعني اية لما أتحبس
أربع سنين حبس احتياطي
حبس أعتباطي
يعني اية مش حاسة بالعمر و غلاوتة
بتمصي مر العمر لية ؟
دا أنا كنت حـ أوهب لك حلاوتة
أنا عمري ما أتأمرت
ولا حطيت شروطي
مكان ما ترسي مركبك
بابني شطوطي
أنا كنت جيشك لما مماليكك باعوكي
و كنت يوسف لما عيشتي سنين عجاف
ضلوعي دي
اللي في معركة قادش حموكي
و شفايفي دي
اللي ما بطلتش في يوم هتاف
دا أنا كل شبر في ارضك
أتمرمغت فيه
و كل يوم عيشتة
أنا أتعذبت بية
علا صوت أذانك جرس
في الشدة صاحينلك
من أمتي كان الحرس
هما اللي باقينلك
بعتيني علشانهم
و عينيكي معصوبة
يا تري أنتي خاينة
ولا زيي مغصوبة
***********
علمونا بالعصايا
و رضعونا الخوف رضاعة
علمونا في المدارس
يعني اية كلمة قيام
علمونا نخاف من الناظر
فيتمنع الكلام
علمونا أزاي نخاف
و أزاي نكش
بس نسيو يعلمونا ألاحترام
فماتزعليش
لما أبقي مش بسمع الكلام
و لما أبقي خارج عن النظام
مستنياه أية من طفل
ربوة عـ الزعيق
غير المشاكل و الخناق
كل اللي بيقوللك بحبك
دول نفاق
أنا لما قولت لك بحبك
كان نفاق
الحب يعني أتنين بيدو
مش أيد بتبني
و ستميت تيت تيت يهدو
الحب حالة
الحب مش شعر و قوالة
الحب يعني براح
في قلب العاشقين للمعشوقين
يعني الغلابة ينامو في الليل
دفيانين
الحب يعني جواب لكل المسجونين
هما لية بقوا مسجونين
يعني اعيش علشان هدف
علشان رسالة
يعني احس بقيمتي فيكي
و أني مش عايش عوالة
يعني لما أعرق
تكافئيني بعدالة
الحب حالة
الحب مش شعر و قوالة
الحب حاجة ماتتوجدش فـ وسط ناس
بتجيب غداها من صناديق الزبالة
**************
بارت مراعينا
و البئر جف
و الجوع بيكوينا
و الصبر ما كف
و القلب لا يهدا
و الجرح لا يشفا
****************
جاءوا بمواكبهم
و أشتغلت الزفة
الدفة مظبوطة
و أصلاً مافيش دفة
و الكفة مش مايلة
علشان مفيش كفة
و جحا اللي جاي بالليل
لساة بيتخفي
شايفة ديدان الغيط
سارحة و مارحماشي
من جانبة شاف الدود
سابة و راح ماشي
ولا أتكسف من ناس
ولا حس علي طولة
الناس عشمهم كبير
جريوا بيشكولة
ضحك جحا ضحكة .. مواشي
مادام بعيد عن طيني .. ماشي
الدود قاعدلك يا جحا
ولابد في طينك
بعد ما يمص في دمنا
مش حـ يحللة ألا طينك
أحنا أهلك
أحنا رجالتك
أحنا أمانك
أحنا وقت الشدة سندك
أحنا زادك
يا جحا أحمي ولادك
لو كنت عاوز تحمي طينك
سوف أرحل
ربما يلقيني من أرجو لقاة
همشي ويا الشحاتين
و أبكي علي حلمي اللي تاة
بس مش هشحت رغيف
هشحت وطن لله
أهلا وسهلا بك زائرنا الكريم ياسفنا انك غير مشترك في منتدى بيت فور العرب لتسجيل الرجاء اضغط هنـا (للشرح طريقةالتسجيل اضغط هنا)
قصيدة ( جحا ) لهشام الجخ
العرض العادي
